Абьейдегі дрон соққысы: 150 адам қаза тапты

Судан мен Оңтүстік Судан арасындағы даулы Абьей аймағында дрон соққысынан нарықта кемінде 153 адам қаза тапты. Шабуыл дүйсенбі күні түсте Амиет базарына жасалды деп хабарлайды DW мен Al Jazeera.

Абьейдің ақпарат министрі міндетін атқарушы Йохана Акол Нгордың айтуынша, алғашында 73 адам қаза тапқаны хабарланған, бірақ сейсенбіге қарай құрбандар саны 153-ке жеткен. Шабуыл салдарынан 8 мыңға жуық адам үйлерін тастап кетуге мәжбүр болған.

Оңтүстік Судан билігі шабуылға Судан әскерін айыптады, бірақ нақты дәлел келтірген жоқ. Сыртқы істер министрлігі де Судан армиясын кінәлап, елшісін шақыртып, наразылық білдірді.

Куәгерлердің айтуынша, дрон жанармай қоймасына тиіп, үлкен өрт шыққан. Өрт түні бойы сөндірілмей, сейсенбі күні де жалындап тұрған. Шексіз дәрігерлер ұйымы (MSF) жақын маңдағы Амет Бек ауруханасында 20-дан астам жараланғанды қабылдағанын, олардың көбінде күйік бар екенін хабарлады.

Абьей мәртебесі әлі шешілмеген

Абьей аймағы мұнайға бай, бірақ 2005 жылғы бейбіт келісім мен 2011 жылы Оңтүстік Судан тәуелсіздік алғаннан кейін де мәртебесі шешілмеген. Жоспарланған референдум өтпеді, ал БҰҰ-ның уақытша қауіпсіздік күштері аймақта 15 жылдан бері орналасқан.

2023 жылдың сәуірінде басталған Судандағы азаматтық соғыс аймақтағы шиеленісті одан әрі күшейтті. Судан әскері мен Жедел қолдау күштері (RSF) дрондарды қақтығыста кеңінен қолданады. БҰҰ өкілі Стефан Дюжаррик бұл шабуылдарға алаңдаушылық білдіріп, олардың үш жылдан астам соғыстан зардап шеккен қауымдастықтарға ауыр соққы болып отырғанын айтты.