Ақтаудағы ұшақ апаты: Көріпкелге аян берген жолаушы комадан шықты

Бірер күн бұрын ғана Ақтаудағы ұшақ апатының бір жолаушысы қазақстандық көріпкел Айгүл Бердіғалиеваға «байланысқа шыққаны» туралы ақпарат тараған болатын. Ақпаратқа сай, ұшақ апатындағы бір жолаушының рухы көріпкел Айгүл Бердіғалиеваға аян беріп, апат болған жерде өзінің бір заты қалғанын хабарлаған көрінеді, деп жазады democrat.kz.

Қазақстандық көріпкел рухтың нұсқауымен ол көрсеткен жерге барып, алтын сырғаның бір сыңарын тауып алады. Кейінірек ол сырғаны полиция өкілдері «иесіне біз жібереміз» деп тәркілеп алған еді.

Енді міне, қазақстандық көріпкелге «хабар берген» рух иесі, әзербайжан келіншек қаншама аптадан бері жатқан комадан есін жиыпты.

Бұл туралы көріпкел Айгүл Бердіғалиеваның өзі хабарлады.

«Демек, маған комада жатқанда хабар берген екен. Мен оның сырғасын тапқан күні келіншек есін жиыпты. Қазір жағдайы бір қалыпты дейді. Баку ауруханасында. Ол әйел — жүкті екен. Ең кереметі — ішіндегі сәбидің жағдайы өте жақсы екен», — деп көріпкел қуанышымен бөлісті.