Астанада «Жаңа адамдар» қозғалысы әлеуетті педофилді әшкерелеп, полицияға тапсырды

Астанада «Жаңа адамдар» қозғалысының өкілдері әлеуетті педофилдердің мінез-құлқындағы заңдылықтарды анықтап, кезекті күдіктіні әшкерелеп, оны полицияға тапсырды, деп хабарлайды sadaq.kz.

Қозғалыстың «124» азаматтық науқаны аясында жыл бойы кәмелетке толмағандарға қауіп төндіруі мүмкін тұлғаларға қарсы күрес бірнеше рет жүргізілген.

Белсенділердің айтуынша, мұндай адамдардың басты «қаруы» – анонимділік. Сондықтан олар күдіктілерді әшкерелеу арқылы осы жасырындықты жоюды мақсат етеді. Жүргізілген жұмыстар нәтижесінде әлеуетті қаскөйлердің ортақ мінез-құлық үлгілері анықталған.

Атап айтқанда, олар алдымен баланың сеніміне кіруге тырысады, кейін жағдайды жасыру үшін түрлі манипуляцияларға барады және онлайн қарым-қатынасты біртіндеп офлайн кездесуге ұластыруға ұмтылады.

Осы үлгіні тексеру мақсатында белсенділер 13 жастағы қыздың атынан жалған аккаунт ашып, тәжірибе жүргізген. Көп ұзамай күдікті тарапынан белсенділік байқалған: ол қызға комплимент айтып, эмоциялық жақындасуға әрекет жасап, назарын аударуға тырысқан. 

Біраз уақыттан кейін бетпе-бет кездесуді ұсынған. Кездесу қаладағы кинорумдардың бірінде жоспарланып, аталған орынға «Жаңа адамдар» қозғалысының белсенділері барған.

Күдікті ретінде 1997 жылы туған азамат анықталған. Оған жазбаша хат алмасулар мен басқа да дәлелдер ұсынылған. Белсенділерді көргеннен кейін ер адам өз әрекетін мойындаған.

Алайда заң талаптарына сәйкес, жиналған барлық материалдар құқық қорғау органдарына тапсырылды. Қазіргі уақытта аталған дерек бойынша тиісті тексеру жұмыстары жүргізілуде.