Дурбанда наразылық кезінде 50 адам шетелдікті ұрып өлтірді

Оңтүстік Африканың Дурбан қаласында бейсенбіде шетелдік азамат наразылық шеруі кезінде шамамен 50 адамнан құралған топтың шабуылынан қаза тапты, деп хабарлайды BBC мен ABC News полицияға сілтеме жасап.

Полицияның мәліметінше, ер адам 30-40 жастар аралығында болған, жеке басы әлі анықталмаған. Ол жол жиегінде тұрған кезде алдымен екі адам жақындап, артынша үлкен топ ұрып-соққан. Жәбірленуші оқиға орнында көз жұмды. Күдіктілер ұсталмаған, кісі өлтіру фактісі бойынша тергеу жүріп жатыр.

Шерулердің астары

Бұл оқиға Оңтүстік Африкада бірнеше айға созылған мигранттарға қарсы наразылықтар аясында орын алды. Осы айдың басында Дурбан мен Йоханнесбург маңындағы Соуэтода дүкендер мен көліктер өртенген. Шерулер кейде зорлық-зомбылыққа ұласып, Нигерия, Мозамбик және Малави азаматтарының өлімі туралы хабарлар тараған, алайда Оңтүстік Африка билігі кейбір деректерді жоққа шығарған.

Елдегі жұмыссыздық деңгейі жұмыс күшінің үштен біріне жетеді, мигранттарды жұмыс орындарын тартып алады деп айыптайды, бірақ зерттеушілер бұл тұжырымдарды растамайды. Президент Сирил Рамафоса зорлық-зомбылықты айыптап, шекара бақылауындағы кемшіліктерді мойындады. Үкімет биыл он мыңдаған шетелдікті депортациялаған немесе елге қайтарған.

Полиция мотивті әлі анықтаған жоқ, тергеу жалғасуда.