Human Rights Watch: Израиль Ливанда теріні сүйекке дейін күйдіретін ақ фосфор қолданды

Human Rights Watch (HRW) халықаралық құқық қорғау ұйымы Израиль қарулы күштерінің Ливанның оңтүстігіндегі елді мекендерге қарсы ақ фосфор оқ-дәрілерін қолданғанын мәлімдеді. Ұйым өкілдері бұл әрекеттің халықаралық гуманитарлық құқық нормаларын бұзуы мүмкін екенін алға тартып, бейбіт тұрғындарға төнген қауіпке алаңдаушылық білдірді, деп хабарлайды Sadaq.kz.

Мәліметтерге сәйкес, тыйым салынған нысандар 3 наурыз күні Ливанның Йохмор (Yohmor) қалашығының үстінен тасталған. Бұл оқиға аймақтағы «Хезболла» тобы мен Израиль арасындағы қақтығыстың шиеленісуі және гуманитарлық агенттіктердің құрбандар санының артуы туралы ескертулері аясында орын алып отыр.

Ақ фосфор — теріні сүйекке дейін күйдіретін, ауыр жарақаттар мен ұзақ мерзімді денсаулық ақауларын тудыратын аса қауіпті химиялық зат. Халықаралық заңнама бойынша, ауыр зардаптарға әкелетін мұндай жанғыш заттарды халық тығыз қоныстанған аймақтарда қолдануға қатаң тыйым салынған.

Құқық қорғаушылар бұл жағдайды халықаралық деңгейде тергеу қажеттігін айтуда. Қазіргі уақытта Ливанның оңтүстігіндегі жағдай қиындап, гуманитарлық дағдарыс қаупі артып келеді.