Қарағанды облысында үй өртеніп, 44 жастағы ер адам көз жұмды
Құтқарушылар үй ішінен 27 литрлік газ баллонын сыртқа шығарды. Алайда тұрғын үйден ер адамның мәйіті табылды.
Қарағанды облысында екі пәтерлі тұрғын үй өртеніп, 44 жастағы ер адам көз жұмды, деп хабарлайды Sadaq.kz.
Қайғылы оқиға 20 қазан күні кешке Абай ауданына қарасты Дубовка ауылындағы Саялы көшесінде болған. Өрт салдарынан үйдің шатыры мен екі пәтердің төбе жабындары зақымданған. Сондай-ақ пәтерлердің біріндегі жиһаз, тұрмыстық заттар мен терезе блогы бүлінген. Жалын 100 шаршы метр аумақты шарпыған.
Өрт кезінде пәтерлердің бірінің 15 шаршы метр аумақтағы төбе жабыны опырылып түскен. Құтқарушылар үй ішінен 27 литрлік газ баллонын сыртқа шығарды. Алайда тұрғын үйден ер адамның мәйіті табылды.
Өрт 21 қазан күні сағат 00:34-те толық сөндірілді. Алдын ала болжам бойынша, өртке пеш мұржасының ақауы себеп болуы мүмкін. Қазіргі уақытта оқиғаның нақты себебі анықталып жатыр.
