Қазақстан Қытайға киіктерді қашан және қанша мөлшерде береді? Министрдің жауабы

Экология және табиғи ресурстар министрі Ерлан Нысанбаев Қазақстанның киік популяциясын қалпына келтіру мақсатында Қытайға жануарларды беру жобасы туралы сұраққа жауап берді, деп хабарлайды Sadaq.kz.

Министрдің айтуынша, жобаны іске асыру үшін Қытайдан арнайы ғалымдар тобы келген. Олар қазақстандық мамандармен бірлесіп, киіктер баратын аймақтардың табиғи ерекшеліктерін, атап айтқанда флорасы мен фаунасын мұқият зерттеген. Басты мақсат — жануарлардың еркін өсіп-өнуіне қолайлы ортаны таңдау.

Бұған дейін министр киіктерді тасымалдау жұмыстары екі кезеңге жоспарланғанын айтқан болатын. Бірінші кезең 2026 жылы басталып, Қытайға 400 бас жіберіледі. Ал 2027 жылы негізгі тасымал жүргізіліп, тағы 1100 бас киік тасымалданады.

Тасымалдау үшін тек сеголеткалар, яғни биылғы төлдер таңдап алынады. Мамандардың пікірінше, бұл жастағы жануарлар ұзақ жол жүру кезіндегі стрессті жеңіл көтереді және жаңа табиғи ортаға тез бейімделеді.