«Қазақстанда киберқылмысты жеңу мүмкін емес»: ІІМ өкілі мәлімдеме жасады

Ішкі істер министрлігінің Киберқылмысқа қарсы іс-қимыл департаментінің бастығы Жандос Сүйінбай Орталық коммуникациялар қызметінде өткен брифингте елімізде киберқылмысты жеңу мүмкін емес екенін мәлімдеді, деп хабарлайды 

Ішкі істер министрлігінің Киберқылмысқа қарсы іс-қимыл департаментінің бастығы Жандос Сүйінбай қазіргі уақытта Қазақстанда немесе басқа елдерде киберқылмыспен күресу мүмкін емес екенін мәлімдеді.

Оның айтуынша, бұған үш фактор әсер етеді.

"Біріншіден, бұл – қылмыстың трансұлттық сипаты, яғни, қылмыскерлердің шетелде болуы. Қылмыскерлер шекарамен шектелмегенімен, құқық қорғау органдарының шекаралары бар. Халықаралық заңнама бар, сұрау жіберу кезінде уақыт жоғалтады. Ал қылмыскерлердің шекарасы жоқ. Бұл фактор да қылмыстың жойылмауына әсер етеді", - деді Жандос Сүйінбай.

Киберқылмысқа қарсы іс-қимыл департаменті басшысының айтуынша, екінші фактор - технологиялық даму жылдамдығы.

"Интернет қазіргі уақытта жылдам дамуда, сондықтан қылмыскерлер де технологиялық жетістіктерді пайдаланып жатыр. Жасанды интеллект пен дипфейктерді қылмыскерлер белсенді түрде қолданады. Заңнама өзгергенше, қылмыскерлер... (бұл технологияларды – редактордың ескертпесі) пайдалана алады", - деді ол.

Жандос Сүйінбайдың айтуынша, киберқылмыстың белең алып отыруына айтарлықтай ықпал ететін адами факторды да жоққа шығаруға болмайды.

"Қылмыскерлер ең алдымен адам психологиясын нысанаға алады. Ал егер адам SMS кодын немесе құпия сөзді өзі жіберсе, оларды тоқтату қиын болады", - деді ол.

Ішкі істер министрлігі өкілінің айтуынша, бұл факторлар киберқылмысты тек Қазақстанда ғана емес, бүкіл әлемде тоқтатуға кедергі келтіруде.