Ким Чен Ын жаңа Ялу өзені көпірі арқылы Қытайға сапар шекті

Солтүстік Корея басшысы Ким Чен Ын сенбі күні жаңадан ашылған Ялу өзені көпірі арқылы Қытайға келді. Бұл оның бір жылдан астам уақыттағы алғашқы шетел сапары болды, деп хабарлайды The Guardian мен Al Jazeera Оңтүстік Корея шенеуніктеріне сілтеме жасап.

Ким Пхеньяннан Синыйджуға пойызбен барып, жаңа көпірден өтіп, Ляонин провинциясының шекарадағы Даньдун қаласына жетті. Сапар алдын ала жарияланбаған, Пхеньян да, Бейжің де әзірге растамады.

Yonhap агенттігінің хабарлауынша, Қытай премьері Ли Цян да Даньдунға келген. Reuters агенттігі Оңтүстік Корея шенеунігіне сілтеме жасап, Ли Цянның Киммен кездескенін жазды. Алайда Қытай Сыртқы істер министрлігі түсініктеме беруден бас тартты.

3 шақырымдық төрт жолақты көпір 2014 жылы салынып біткенімен, Солтүстік Корея жағындағы жолдар мен кедендік нысандардың дайын болмауына байланысты ашылуы кешіктірілген. Көпір осы айдың ортасында ресми түрде ашылды, бұл екі ел арасындағы сауда-саттықты арттыруға бағытталған.

Сапардың мән-жайы

Сапар Қытайдың Корей соғысына (1950-1953) араласуының мерейтойы қарсаңында өтті. Kyodo агенттігінің хабарлауынша, көпір маңында және соғыс мұражайы жанында қозғалыс шектеліп, қонақүйлерде брондау тоқтатылған. Дипломатиялық дереккөздер бұл шараларды Солтүстік Кореяның жоғары лауазымды шенеунігінің сапарымен байланыстырды.

Бұл Кимнің Қытайға алтыншы сапары. Соңғы рет ол 2025 жылдың қыркүйегінде Бейжіңдегі әскери шеруге қатысқан еді. Сол кезде ол Си Цзиньпин және Владимир Путинмен бірге болды. Си маусымда Пхеньянға барған.

Осы арада Оңтүстік Кореямен қарым-қатынас нашарлап барады. Кимнің әпкесі Ким Ё Чжон қыркүйек айының соңынан бері Сеулді сынап онға жуық мәлімдеме жасады, сондай-ақ шекарада дауыс зорайтқыштарды қайта қосу жоспарын жариялады.

Қараша айында Шэньчжэньде Аpec саммиті өтеді, бұл Ким мен Дональд Трамптың кездесуі мүмкін деген болжамдарға себеп болды. Алайда Reuters агенттігі АҚШ пен Оңтүстік Корея шенеуніктерінің Кимнің АҚШ президентімен биыл кездесу ықтималдығын төмен бағалайтынын жазды.