«Қол-аяғымды байлап, тонап кетті»: Тараздық келіншектің «спектаклі» анықталды

Тараз қаласында полиция қызметкерлері ойдан шығарылған қылмыстың бетін ашты. Жергілікті тұрғын үйіне бетперде киген қарақшы кіріп, аяқ-қолын байлап, сейфтегі алтындары мен ақшасын ұрлағанын айтып, дабыл қаққан. Алайда тергеу барысында бұл оқиғаның астарында мүлдем басқа шындық жатқаны белгілі болды, деп хабарлайды Sadaq.kz.

Оқиға қалай басталды?

Полицияға хабарласқан әйелдің айтуынша:

«Бетперде киген белгісіз ер адам үйіне кіріп, қарумен қорқытқан, қолдарын байлап, алтындары мен ақшасын алып кеткен».

Ауыр қылмыс туралы ақпарат түсісімен жедел қызметтер жұмылдырылып, тергеу және іздестіру іс-шаралары шұғыл басталды. Тексеру барысында ешқандай шабуылдың болмағаны анықталды.

Өтіріктің себебі не?

Тәртіп сақшылары анықтағандай, бұл «қойылымның» артында отбасылық мәселе жатыр.

«Әйел адам күйеуімен жанжал туындамас үшін қарақшылық шабуыл туралы оқиғаны ойдан шығарған. Шын мәнінде ол алтын әшекейлерін бірнеше ай бұрын күйеуіне айтпай сатып жіберген».

Яғни, «қол-аяғы байланған» жәбірленуші іс жүзінде алтындарын әлдеқашан ломбардқа өткізіп, ақшасын жаратып қойған. Ал күйеуі заттардың жоқтығын байқағанда, осы «қарақшы» туралы ертегіні құрастырған.

Енді не болады?

Енді келіншек күйеуінің алдында ғана емес, заң алдында да жауап береді. Қылмыс туралы жалған хабарлама беру бойынша тергеу амалдары басталды.

«Жалған хабарлама жасау – қылмыстық жауапкершілікке әкеп соғады. Мұндай әрекеттер құқық қорғау органдарының күштері мен құралдарын нақты қылмыстарды ашып, тергеуге кедергі жасайды»,–деп полиция ескертті.