PHP тіліндегі ақау миллиондаған сайтты қауіпке ұшыратты
Жасанды интеллект көмегімен PHP бағдарламалау тілінде он жылдар бойы жасырынған екі қауіпті осалдық табылды. Әлем үкіметтері веб-сайт иелерін шұғыл жаңартуға немесе сайттарды уақытша өшіруге шақырды.
Сәрсенбіде әлемнің бірнеше елінің үкіметтері мен киберқауіпсіздік агенттіктері PHP бағдарламалау тілінде табылған екі қауіпті осалдыққа байланысты шұғыл ескерту жасады. PHP2Shell деп аталатын бұл ақауларды Calif және Wiz компанияларының зерттеушілері OpenAI жасанды интеллект үлгілерінің көмегімен анықтады (BBC, CNBC, Al Jazeera), деп хабарлайды Sadaq.kz.
PHP тілі әлемдегі веб-сайттардың 70%-дан астамында қолданылады. Оның ішінде Wikipedia, WordPress сияқты платформалар, онлайн дүкендер мен мемлекеттік порталдар бар. Осалдықтар шабуылдаушыларға құпиясөзсіз серверлерге қол жеткізіп, зиянды код орындауға мүмкіндік береді.
АҚШ Ұлттық қауіпсіздік агенттігі (NSA) барлық ұйымдарға PHP жүйелерін дереу жаңартуға немесе мүмкін болмаса, сайттарды уақытша өшіруге кеңес берді. Агенттік мәлімдемесінде:
"PHP пайдаланатын барлық ұйымдар екі маңызды осалдықты жоюға арналған жаңартуға дайын болуы керек", — делінген.
Ұлыбритания, Еуропалық одақ, Австралия, Сингапур, Канада және Жапония да осындай ескертулер жасады. Жапония премьер-министрі Санаэ Такаичи әлеуметтік желіде халықты PHP қолданатын сайттарды тексеруге шақырды.
Жаһандық іс-қимыл
Финляндия, Германия, Франция, Бельгия, Нидерланды және Чехия үкіметтері кейбір ресми сайттарын уақытша өшірді. BBC, Эдинбург кеңесі, Женева университеті де өз платформаларын тоқтатты.
PHP әзірлеушілері осалдықтарды жоюға арналған патчтар шығарды. «Барлық PHP пайдаланушыларына дереу жаңартуға кеңес береміз», — деді PHP Foundation.
Amazon компаниясы өзінің MadPot жүйесі арқылы осалдықтарды пайдалану әрекеттерін анықтады. Сарапшылар алдағы апталарда шабуыл әрекеттерінің көбеюі мүмкін екенін ескертеді, себебі техникалық мәліметтер жарияланды. Пайдаланушыларға фишингтік хабарламалардан сақ болу ұсынылады.
