WTI мұнайы $109-дан асты, Brent бес айлық максимумда

АҚШ-тың WTI мұнайының қараша айындағы фьючерстері сейсенбіде барреліне 109,08 долларға дейін көтеріліп, күніне 5,23% өсім көрсетті. Бұл — қатарынан тоғызыншы сессиядағы өсім және айлық көрсеткіш 20%-ға жуықтады. Brent маркалы мұнайдың желтоқсандағы фьючерстері 1,65% жоғарылап, 111,36 долларға жетті — бұл мамыр айынан бергі ең жоғары баға, деп жазады Sadaq.kz.

Бағаның өсуіне Таяу Шығыстағы шиеленіс себеп болды. CNBC хабарлауынша, соңғы екі аптада Ормуз бұғазында кем дегенде 18 коммерциялық кеме оқ астында қалды. Иранның Ислам революциясы сақшылар корпусы (ИРСК) Tasnim агенттігіне берген мәлімдемесінде екі «талапқа сай емес» мұнай танкері өздерінің теңіз бөлімшесі қойған миналарға соғылып, өртенгенін айтты.

Сонымен қатар Иран Сыртқы істер министрлігінің баспасөз хатшысы Есмаил Бакаи апта сайынғы баспасөз мәслихатында Тегеран Американың кез келген соққысына «тең дәрежеде, тіпті одан да күштірек» жауап беретінін мәлімдеді. АҚШ президенті Дональд Трамп бұған дейін Америка күштері 3 қарашадағы аралық сайлауға дейін Иранға шабуыл жасамайтынын айтқан еді.

Сарапшылар не дейді?

PVM Oil Associates талдаушысы Тамаш Варга CNBC-ге берген түсініктемесінде мұнай нарығындағы тапшылық Таяу Шығыстан экспорт көлемінің төмендеуінен, АҚШ-тың ресейлік «көлеңкелі флотқа» санкциялардан босатуынан және АҚШ-тың коммерциялық мұнай қорының азаюынан екенін атап өтті.

Инвесторлар алдағы күндері Ормуз бұғазындағы жағдайдың дамуын және мұнай қоры туралы есептерді бақылайтын болады.