Жамбыл облысында тағы бір сарбаз қаза тапты: Іс Бас прокурордың жеке бақылауында

Жамбыл облысында әскери борышын өтеп жүрген сарбаздың қаза болуына байланысты сотқа дейінгі тергеп-тексеру амалдары басталды. Ресми мәліметтерге сүйенсек, қайғылы оқиға 27 қаңтар күні қару ұстау кезінде орын алған жарақаттан кейін болған. Қазіргі таңда Ішкі істер министрлігінің әскери-тергеу органдары істің мән-жайын анықтауға кірісті.

Оқиғаның күрделілігіне байланысты арнайы жедел-тергеу тобы құрылып, оның жұмысы Бас Прокурордың жеке бақылауына алынды. Мән-жайды нысаналы әрі жан-жақты зерттеу мақсатында оқиға орнына Қорғаныс министрінің орынбасары, Бас әскери прокурор және ІІМ Әскери-тергеу департаментінің басшылығы арнайы барды.

Тергеу тобына тек осы оқиғаны ғана емес, еліміздің барлық әскери бөлімдеріндегі тәртіп пен қауіпсіздік талаптарының сақталуына ауқымды тексеру жүргізу тапсырылды. Бас прокуратура таратқан мәлімет бойынша, жақында өтетін арнайы Алқа мәжілісінде әскери қызметшілердің өмірі мен денсаулығын сақтау мәселесі басты назарда болады, деп хабарлайды Sadaq.kz.