Жанабыловтың әйелі бүгінгі сот отырысына бармай қойған

Астанада блогерлер Ерболат Жанабылов пен Эльмира Төлегеноваға қатысты сот процесі жалғасып жатыр. Бүгін айыпталушылар соңғы сөзін айтуы тиіс болған, алайда Төлегенова сот отырысына келмеді, деп хабарлайды Sadaq.kz сайты Tengrinews.kz-ке сілтеме жасап. 

Айыпталушылардың адвокаты Гаухар Айтжанованың айтуынша, қорғауындағы азаматша денсаулығына байланысты сотқа қатыса алмаған.

«Оның жағдайы нашарлағанын сот отырысы басталардан бір жарым сағат бұрын білдім. Жағдайы түзелер деп үміттендік. Қазір ол дәрігер шақыртты. Сондықтан растайтын құжаттарды кейін ұсынамын. Физикалық тұрғыда барып үлгермедім», — деп түсіндірді адвокат.

Судья Әділбек Баймаханов сот отырысы кезінде Төлегенованың денсаулығына қатысты растайтын құжаттар ұсынылмағанын атап өтті.

«Төлегенованың денсаулық жағдайын растайтын құжат болмағандықтан, сот сіздерге екі сағат уақыт береді. Осы уақыт ішінде не растайтын құжаттарды ұсыныңыздар, не айыпталушыны онлайн қосыңыздар. Егер құжаттар ұсынылмаса, сот келмеу себебін негізсіз және қылмыстық істі қарауға кедергі келтіріп отыр деп бағалайды. Олай болмаған жағдайда сот тиісті шаралар қабылдайды», — деді судья.

Осыған байланысты судья екі сағатқа үзіліс жариялады.