«Соңғы екі жылында ғана көрді»: Қалдаяқовтың келіні Шаханов туралы жүрек ауыртар дерек айтты (ФОТО)
Композитор Шәмші Қалдаяқовтың келіні Ботагөз Қалдаяқова ақын, қоғам қайраткері Мұхтар Шахановтың өмірінің соңғы жылдарындағы маңызды бір ақиқатты жария етті, деп хабарлайды Sadaq.kz.
Ол Мұхтар Шахановпен отбасының байланысы ертеден басталғанын айтып, ақын туралы естелігімен бөлісті.
«Мұхтар, менің жұбайым Мұхтар-ағаны бала кезінен білетін. Ақын олардың Ленин көшесіндегі пәтеріне жиі келетін қонақ болған. Ал 1991 жылы Шәмші Қалдаяқов ел бойынша 60 жылдық мерейтой концерттерінен кейін қатты сырқаттанғанда, дәл Мұхтар Шаханов – жақын досы әрі серігі ретінде оны Алматыға, өлім аузында жатқан күйінде үйіне жеткізген еді», – деді ол.
Сондай-ақ Ботагөз Қалдаяқова ақынмен 2024 жылдың соңында танысып, Шәмші Қалдаяқовпен бірлескен әндердің авторлық құқығын қорғауға қатысты жұмыс басталғанын айтты.
«Мұхтар Шахановпен 2024 жылдың соңында өзім таныстым. Сол кезде қорымыз Шәмші Қалдаяқовпен бірлесіп жазылған әндердің авторлық құқықтарын қорғау ісінде оның мүддесін қорғайды деп келістік. Сол кезде мені таңғалдырғаны – Мұхтар Шахановтың өз сөзінше, сегіз жыл бойы авторлық қоғамдардан бір тиын да қаламақы алмағаны болды. Бірақ “Шәмші әлемі” қоғамдық қорының күш-жігерінің арқасында біз Шахановтың сөзіне және Қалдаяқовтың әуеніне жазылған әндерді негізгі пайдаланушылардан әділ сыйақы төлеуге қол жеткіздік. Мұхтар аға өмірінің соңғы екі жылында болса да, өз мұрасына қатысты әділдіктің бар екенін көріп кетті. Жатқан жері жайлы болып, Жаратқан жанына тыныштық берсін. Мұхтар Шаханов нағыз азамат, ақын, тынымсыз шығармашылық иесі еді», – деп жазды ол.
Айта кетейік, ақын Мұхтар Шахановпен қоштасуға зиялы қауым өкілдері мен өнер адамдары көптеп жиналды.
Сіздің реакцияңыз қандай?
Ұнады
0
Ұнамады
0
Керемет
0
Күлкілі
0
Сұмдық
0
Қайғылы
0
Жарайсың
0
