Базарда көлік бір топ адамды қағып кетті

Магдебургтегі Рождестволық базарда көлік бір топ адамды қағып кетті. Германия билігі кемінде 11 адамның қаза тауып, 80-нен астамы жараланғанын мәлімдеді. Бұл туралы KAZ.NUR.KZ хабарлайды.

Оқиға жергілікті уақыт бойынша 19:04-те болған. Алдын ала мәлімет бойынша, күңгірт түсті BMW бір топ адамды қаққан. Жүргізуші бірден ұсталды. Қала баспасөз хатшысы Майкл Рейф бұл оқиғаны "Рождестволық базарға жасалған шабуыл" деп атап, лаңкестік актінің болғанын растады.

Дегенмен, неміс полициясы бұл мәлімдемені әлі нақтылаған жоқ. Қылмысорнында жедел жәрдем қызметкерлері кезекшілік атқарып, жарақат алғандарға алғашқы медициналық көмек көрсетуде. Қауіпсіздік мақсатында базар жабылып, трамвай қозғалысы уақытша тоқтатылды. DW басылымының хабарлауынша, Магдебургтегі Рождестволық базарға келушілерді бар жылдамдықпен қаққан көлік жүргізушісінің Сауд Арабиясының тумасы екені анықталды.

Жергілікті БАҚ-тың мәліметінше, ол Германияда психиатр болып жұмыс істеген және Бернбург қаласында тұрған. Бұл қала Магдебургтен 50 км жерде орналасқан. Күдіктінің Германияда ұзақ тұруға рұқсаты болғаны хабарланды. Сонымен қатар оның Сауд Арабиясынан келген әйелдерге елден қашуға көмектесу бойынша кеңес беріп жүргені туралы ақпарат пайда болды. Оның осы тақырыпта арнайы жеке веб-сайты болған және ол Германияда саяси баспана беру мәселелерімен де айналысқан.

BILD-тің хабарлауынша, Германия канцлері Олаф Шольц X платформасындағы жазбасында былай деп жазды: "Магдебургтен жеткен хабар нашар болжам жасауға мәжбүрлейді. Құрбандардың жақындарына көңіл айтамын. Біз солардың, Магдебург тұрғындарының жағындамыз. Осы қиын сағаттарда құтқару қызметтеріне ризашылығымды білдіремін".