«Намаз оқиды»: Әйелін балталап тастаған мұғалімді әріптестері ақтап отыр

Кеше баспасөз беттерінде Қызылорда облысы Шиелі ауданында балтамен әйелін бірнеше рет ұрып, саусақтарын шапқан мектеп мұғалімі туралы ақпарат тараған еді. Күдікті қамауға алынды, деп хабарлайды  31-арнаның Информбюро жаңалықтар бағдарламасы. 

Жантүршігерлік оқиға Шиелі ауданына қарасты Бала би ауылында болған. Өз әйелін балталаған мұғалімнің әрекетіне тұрғындар да, мектептегі ұжымдастары да әлі сене алар емес.

Күдікті 21 жыл бойы білім ордасында биология пәнінен сабақ берген. Педагогтар бұған дейін маманның оғаш қылығын көрмедік деп ақтап отыр. 

“Ол арақ ішпейді, темекі шекпейді. Намаз оқиды. Ондай тәртіпсіздік, келеңсіздікпен ескерту алған емес. Уақытша класс жетекшілікке ұсынып жүрдік. Соңғы уақытта класс жетекші болған жоқ”, – деді №50 орта мектеп директорының орынбасары Райхан Жанқошова.

Қылмыс мұғалімнің өз үйінде болған. Күдікті балтамен 42 жастағы әйелінің бірнеше жерінен жарақат салған. Саусақтарын шауып, өткір құралмен басынан ұрған. 

Мамандар үш күн бұрын ауыр жағдайда жеткізілген келіншек әлі де жансақтау бөлімінде емделеді дейді.

“Келгендегі жағдайы өте ауыр. Диагнозы – политравма. Миы шайқалған. Дәрежесі аса ауыр. Оң қолының 2,3,4 саусақтары сынған. Екі қолы да сынған, ауруханаға ашық жарамен жеткізілді. Маңдай сүйегі де сынған”, – деді Шиелі аудандық көпбейінді ауруханасының бас дәрігері Алмас Әбілпатта.

Отбасылық жанжалға әйелінің Астана қаласындағы жұмыс орнына баруына күйеуі қарсы болып, қызғанғаны себеп болуы мүмкін. Бірақ бұл дерек әлі расталмады. Ал полицейлер күдіктіні өз баспанасында қолға түсіріпті.

“Полиция күдіктіні “адам өлтіруге оқталу” дерегі бойынша ұстады, уақытша ұстау изоляторына қамалды. Тергеу жалғасуда. Өзге мәліметтер жарияланбайды”, – деді Шиелі аудандық полиция бөлімінің басшысы Болатхан Мұқанов.

Қамауға алынған 44 жастағы азамат пен жұбайының бес баласы бар. Кенжесінің жасы төртте.