Енді мектептерде тәртіп бұзған оқушыны ұрып жазалауға рұқсат

Қытайдың оңтүстігіндегі жекеменшік мектеп ата-аналардан балаларына дене жазасын қолдануға рұқсат беру туралы келісім талап еткеннен кейін қоғамда үлкен дау туды, – деп хабарлайды South China Morning Post (SCMP) газеті.

Гуандун провинциясының Янцзян қаласында орналасқан Лунъюань эксперименталды мектебі жаңа ереже енгізіп, оқушылардың тәртіп бұзған жағдайда жазаланатынын мәлімдеді. Жаңа ережеге сәйкес, оқушылар сағаттап тұру немесе алақандарына соққы алу сияқты жазаларға тартылуы мүмкін.

Мектеп әкімшілігінің мәлімдемесінде, сабақта ұйықтау, үй тапсырмасын орындамау және басқа да тәртіп бұзушылықтар жазалауға негіз болатыны көрсетілген. Бұл талап ата-аналарға жіберілген ресми құжатта да жазылған.

Жаңа ережелерге сәйкес, мұғалімдер оқушыларды сызғышпен немесе меңзермен алақандарына ұру арқылы жазалай алады. Алайда жаза бір тәртіп бұзғаны үшін шамамен он соққыдан аспауы керек. Оқушыларды екі сағат бойы тік тұрғызып, рұқсатсыз отырғызбай қоюы да мүмкін.

Мектеп әкімшілігі бұл шараларды оқушылардың жауапкершілігін арттыруға бағытталған деп түсіндіреді. Ресми мәлімдемеде: «Біз студенттерге жіберген қателіктері үшін жауапкершілікті сезінуді үйреткіміз келеді. Бұл олардың қателіктерді қайталамауына және заңға бағынатын азамат болып қалыптасуына көмектеседі», – делінген.