Қарағандыдағы Бөкетов университетінде үш студенттен туберкулез анықталды

Қарағандыдағы академик Е.А Бөкетов атындағы зерттеу университетінде туберкулез ауруы анықталды. Бұл туралы Sadaq.kz сайты Stan.kz-ке сілтеме жасап хабарлайды.

Әлеуметтік желілерде академик Е.А. Бөкетов атындағы Қарағанды университетінің 10 студенті туберкулезбен ауырды деген ақпарат тарады. 

"Ешкім ештеңе айтпай ма? Карантин енгізу керек қой! Тағы қанша студент ауырып, бір-біріне жұқтырып жүр? Карантин де, дұрыс дезинфекция да жоқ!" — деп жазды желі қолданушысы.

Алайда 10 студенттің ауырғаны туралы ақпарат ресми түрде расталмады.

Қарағанды қаласының Қазыбек би атындағы аудандық санитариялық-эпидемиологиялық бақылау басқармасының басшысы Нұрлан Аймағанбетовтің айтуынша, университетте туберкулездің бірнеше жағдайы тіркелген. Алайда сөз үш студент туралы болып отыр.

Оның айтуынша, олар әртүрлі факультеттерде оқиды және бірге тұрмайды.

"Бірі биология-география факультетінде, екіншісі шетел тілдері факультетінде, үшіншісі журналистика факультетінде оқиды. Үшеуі де жатақханада емес, әртүрлі мекенжайдағы пәтерлерде тұрады", — деді Нұрлан Аймағанбетов.

Басқарма басшысының айтуынша, алғашқы жағдай 22 қыркүйекте, екіншісі келесі күні тіркелген. Үшінші студентке қатысты шұғыл хабарлама 24 қыркүйек күні кешке түскен.

Мамандар әзірге бұл жағдайлардың өзара байланысты немесе байланысты еместігін анықтаған жоқ. Қазір санитариялық-эпидемиологиялық бақылау басқармасы тексеру жүргізіп, науқастармен байланыста болған адамдардың шеңберін анықтап жатыр.

"Жақын және алыс байланыста болған адамдар тексеріліп жатыр. Оларды қарап, кімнің ауруы бар, кімнің ауырмағаны және соңғы рет қашан тексеруден өткені анықталуда", — деп түсіндірді басқарма басшысы.

Нұрлан Аймағанбетовтің айтуынша, университетте дезинфекция жұмыстары жүргізілген. Сонымен қатар анықталған туберкулез жағдайларына байланысты университетте карантин енгізу жоспарланып отырған жоқ.