Ұлыбритания қыркүйекте Палестина мемлекетін ресми түрде мойындайды

Ұлыбритания Премьер-министрі Кир Стармер Израиль Газа секторындағы әскери әрекеттерді тоқтатпаса және бейбіт келіссөздерге нақты қадам жасамаса, қыркүйек айында Палестина мемлекетін ресми түрде танитынын мәлімдеді. Бұл туралы ол Палестинадағы жағдайға байланысты өткен сирек шақырылатын жазғы үкімет отырысында айтты, деп хабарлайды BAQ.KZ.

Стармердің айтуынша, егер Израиль Газа секторындағы "жан түршігерлік жағдайды" тоқтатып, атысты доғармаса, Батыс жағалауды аннексияламауға және екі мемлекет негізіндегі бейбіт шешімге бейілділік білдірмесе, Ұлыбритания Палестинаны мойындау қадамын жүзеге асырады.

Премьер-министр Таяу Шығыста "ХАМАС-қа орын жоқ" деген ұстанымын қайталап, Израильден кепілге алынғандарды қайтарып, ХАМАС-ты қарусыздандыруды талап етті.

Бұл ретте халықаралық ұйымдар Израильге қысымды күшейтуде. БҰҰ Газа секторында балалар арасында дұрыс тамақтанбаудың және аштықтың кең етек алу қаупі бар екенін ескертті. Ал Израиль билігі гуманитарлық көмектің көп бөлігі ХАМАС-тың қолына өтеді деп, бұл жағдайға қатысты жауапкершілікті жоққа шығаруда.

Кир Стармердің бұл мәлімдемесін Франция да қолдады. Париж де алдағы уақытта Палестина мемлекетін мойындауға ниетті екенін білдіріп, аймақта бейбітшілік орнатуға үміт артты.