АҚШ пен Иран келісімге электронды форматта қол қойды

АҚШ пен Иран өзара түсіністік туралы меморандумға электронды форматта қол қойды. 19 маусымда Женевада жоспарланған рәсім өтпейді, деп хабарлайды РБК-ға сілтеме жасаған sadaq.kz.

Иран Сыртқы істер министрлігінің баспасөз хатшысы Эсмаил Багаи АҚШ пен Иран соғысты тоқтатуды, Ормуз бұғазын ашуды көздейтін өзара түсіністік туралы меморандумға қол қойғанын мәлімдеді. Ол тараптар құжатқа электронды форматта қол қоюға келіскенін және Женевада бұрын жоспарланған ресми рәсімнің қажеті жоқ екенін айтты. Иран СІМ өкілі құжатқа АҚШ президенті Дональд Трамп пен Иран президенті Масуд Пезешкиан қол қойғанын атап өтті.

"Құжатқа екі мемлекеттің де жоғары лауазымды тұлғалары қол қойғандықтан, оны бұзу, әрине, әлдеқайда ауыр зардаптарға әкеледі. Өткен тәжірибемізді ескере отырып, біз мұның дәл осылай болғанын қаладық", - деді Эсмаил Багаи.

Axios-тың мәліметінше, Ормуз бұғазын мүмкіндігінше тезірек ашу үшін келісімге қол қою жеделдетілген. Сондай-ақ басылым Вашингтон мен Тегеран өкілдерінің Швейцариядағы кездесуі тоқтатылмағанын жазады.

Кездесуде АҚШ вице-президенті Джей Ди Вэнс пен Иран парламентінің спикері Мохаммад-Багер Галибаф Иранның ядролық бағдарламасы бойынша келіссөздердің басталуын талқылайды деп күтіліп отыр.