«Басқа амал қалмады»: Трамп АҚШ-тың ядролық сынақтарын бастауға бұйрық берді

АҚШ президенті Дональд Трамп басқа елдердің әрекеттерін алға тартып, ядролық сынақтарды дереу бастауды бұйырды.

Бұл туралы ол 30 қазанда Truth Social әлеуметтік желісінде жазды. Жазбасында Дональд Трамп әскери ведомствоға америкалық ядролық қаруды сынауға кірісуді тапсырғанын айтқан. 

- Құрама Штаттардың ядролық қаруы кез келген елден көп. Бұл менің алғашқы мерзімім кезінде жүргізілген жаңғыртудың арқасында мүмкін болды. Мен мұны жасағым келмеген, бірақ басқа амал қалмады, — деді Трамп.

АҚШ көшбасшысының айтуынша, Ресей ядролық арсеналы бойынша екінші орында, ал Қытай әзірге артта қалып келеді, бірақ бес жылдан кейін АҚШ-ты қуып жетуі мүмкін. Осыған байланысты ол өз бағдарламаларын дамытып жатқан басқа мемлекеттермен «тең негізде» сынақтар өткізуді тапсырды.

- Сынақтар тез арада басталады, — деп атап өтті Трамп.