«kizdar.kz сайтымен бірге сатылады»: Қарағандыда күмәнді массаж салоны сатуға қойылды

Қарағанды қаласында орналасқан күмәнді массаж салоны 2 миллион теңгеге сатылуда, деп хабарлайды POLITICO.KZ.

Салон Қарағандының танымал аудандарының бірі – ТД «Таир» маңында орналасқан. Сатылым құнына мүлік, майлар мен сүлгілер сияқты шығын материалдары, kizdar.kz сайты мен Instagram парақшалары кіреді. Сондай-ақ, сату кезінде клиенттік база мен жарнама жүргізетін СММ-маман ұсынылады.

Жарнамада массаж салонының ауданы 100 шаршы метр екені, ішінде бес жұмыс бөлмесі, душ кабинасы, бар, ресепшн және санитарлық тораптар бар екені көрсетілген. Қауіпсіздік мақсатында бейнебақылау жүйесі орнатылған.

Дегенмен, салонның қызмет түрі күмән тудыруда. Әсіресе, kizdar.kz сайтында ұсынылған парақша бұл мекеменің қызметінің заңдылығына қатысты сұрақтар туғызады.

Еске сала кетейік, 2024 жылы Қазақстанда жезөкшелікпен айналысуға мүмкіндік берген 1000-нан астам адам әкімшілік жауапкершілікке тартылған. Олардың ішінде мемлекеттік қызметкерлер де болған.