Путин бітім жариялап, Украинаға қарсы ұрысты тоқтатты

Ресей президенті Владимир Путин Ресей Қарулы күштері бас штабының бастығы және қорғаныс министрінің бірінші орынбасары Валерий Герасимовпен кездесуі барысында Ресей тарапы Украинаға қарсы барлық әскери іс-қимылды тоқтататынын мәлімдеді, деп хабарлайды Azattyq Rýhy.

Кремль сайтының мәліметінше Пасха бітімі 19 сәуірде сағат 18:00-ден 21 сәуірде 00:00-ге дейін созылады.

«Бүгін сағат 18.00-ден дүйсенбіге қараған түні 00:00-ге дейін ресейлік тарап Пасха бітімін жариялады. Осы мерзімде барлық әскери іс-қимылды тоқтатуды бұйырамын. Украина жағы да бізден үлгі алады деп ойлаймыз. Сонымен бірге біздің әскер бітімнің ықтимал бұзылуына және қарсыластың арандатушылығына, оның кез келген агрессивті іс-әрекетіне тойтарыс беруге дайын болуы керек», - деді Ресей президенті.

Сонымен бірге Путин Ресей Қарулы күштері «толық көлемде дереу жауап беруге дайын болуы керек» деп атап өтті.