«Сотта көрісеміз»: Министр «Болашақ» комиссия мүшелерін айыптаған үміткер туралы пікір білдірді

Ғылым және жоғары білім министрі Саясат Нұрбек Жасұлан Темірбаев атты азаматтың желіде "Болашақ" бағдарламасы туралы мәлімдемесіне қатысты пікір білдірді.

Бұған дейін Жасұлан Темірбаев әлеуметтік желідегі жазбасында "Болашақ" бағдарламасының комиссия мүшесі одан "орыс тілінде шала сөйлегеніңіз үшін Қазақстанды ұятқа қалдырасыз" деп айтқанын жазған еді.

"Бұл ақиқатқа сай емес. Себебі бізде конкурстық процедуралар екі сатымен өтеді. Бірінші сатыда тест тапсырады. Екіншісінде тәуелсіз сарапшылар комиссиясымен сұхбат жүргізіледі. Бірнеше жылдан бері бүкіл сұхбат видеоға жазылады. Біз осы мәселені бірден қолға алдық. Видеоны қарағанда ондай сұрақтар сұралған жоқ. Бүгін бұл видео жарияланады. Неліктен бірден жарияламадық? Сарапшылардан ресми түрде рұқсат алуымыз керек еді. Себебі олардың да құқығы ескерілуі тиіс", - деді министр тілшілердің сауалына берген жауабында.

Ведомство басшысы даулы жазба иесін Халықаралық бағдарламалар орталығына шақыртқандарын айтты. 

"Негізі осы азаматтарды ескерткім келеді. Бұл - арандатушылық. Менің осы талапкерге бір ғана сұрағым бар. "Болашақ" гранты тағайындалған жағдайда, осындай шағым жасаушы еді ме, жасамас па еді? Неге десеңіз, бұл азамат конкурстық процедурадан өткен жоқ. Қазір ол талапкерді халықаралық бағдарламалар орталығына шақырып, видеоны көрсетіп, бүкіл шағымды қарастырып, түсіндіру жұмыстарын жүргіземіз. Егер келіспеген жағдайда, бір ғана жолы бар - ол сотта көрісу. Біздің бүкіл дәлеліміз бар", - деді Саясат Нұрбек.

Айта кетейік, Жасұлан Темірбаев әлеуметтік желідегі жазбасында "Болашақ" бағдарламасы бойынша комиссия мүшелерінің біреуі оны сұхбат барысында сынға алып, "орыс тілінде шала сөйлегеніңіз үшін Қазақстанды ұятқа қалдырасыз" деп айтқанын мәлімдеді. Оның бұл пікірі қоғамда қызу талқыға түсіп, көпшілік тарапынан наразылық тудырды.