«11 адам ұсталды»: Алматыда есірткі таратқан қылмыстық топ қолға түсті

Алматы қаласы мен Алматы облысының аумағында есірткі саудасымен айналысқан ірі қылмыстық топ ұсталды. Ішкі істер министрлігі баспасөз қызметінің мәлімдеуінше, арнайы операция нәтижесінде заңсыз интернет-дүкеннің жұмысы толығымен тоқтатылған, деп хабарлайды Sadaq.kz.

Жедел-іздестіру шаралары барысында қылмыстық топтың 11 мүшесі қолға түсті. Олардың арасында тек орындаушылар ғана емес, істі ұйымдастырушылар, клиенттермен байланыс орнатқан операторлар және қаржылық мәселелерді реттеп отырған жауапты тұлғалар бар. Топ мүшелері есірткіні «жасырын қойып кету» (бесконтактный сбыт) әдісі арқылы таратып келген.

Тінту жұмыстары кезінде заңсыз айналымнан 3 келіге жуық синтетикалық есірткі; қылмыстық байланыс үшін пайдаланылған құралдар мен цифрлық тасымалдағыштар; банктік карталар табылды.

Аталған дерек бойынша сотқа дейінгі тергеу амалдары басталды. Құзырлы орган өкілдері қылмыстық схеманың барлық егжей-тегжейін анықтап жатыр. Күдіктілерге қатысты тиісті шаралар қабылдануда.