«Әр өткен көліктен сағат сұраймыз»: Жамбыл облысында құлдықта жүрген балалар елден көмек сұрады

Әлеуметтік желіде Жамбыл облысында құлдыққа түсіп, мал бағып жүрген балалардың видеосы тарады, деп хабарлайды Skifnews.kz ақпарат порталы.

Желіде тараған видеода екі бала бес жылдан бері қорлық көріп келе жатқанын айтты. Олар қазақстандықтардан көмек сұрады. 

“Телефонымды алып қойды, мал бағып жүрміз. Әр өткен көліктен сағат сұраймыз. Денемнің бәрі жара. Жатсам да, тұрсам да туған әкемнің қолына барсам деп тілеймін. Анам сөйлегісі келеді, бірақ өзі қорқады”, – дейді мал бағып жүрген балалардың бірі.

Сондай-ақ видеода балалардың денесінің көгергенін, жара қаптағанын көруге болады.

“Бізге көмектесіңіздерші, алып кетіңіздерші, өтінемін. Бізге қой жайғызады. Қой азайып қалса бізден көреді. Сол қой үшін біз таяқ жейміз”, – деді бала.

Алдын ала мәлімет бойынша, бұл жағдай Талас ауданындағы Қаратау қаласының маңында болған. 

Бала құқықтары жөніндегі уәкіл Динара Закиева балалардың қазір тұрып жатқан жері анықталғанын мәлімдеді. 

“Аталған факті бойынша қылмыстық іс қоғалды. Аймақтық уәкіл Даурен Бақжанов барлық мән-жайды анықтау үшін балаларға бара жатыр”, – деді балалар омбудсмені.