Бақтияр Артаевқа 20 жыл бұрын жеңіп алған Вэл Баркер кубогы қайтарылды

Қазақстан бокс федерациясы Бақтияр Артаевқа Вэл Баркер кубогы қайтарылғаны туралы мәлімдеді.

Астанада Қазақстан бокс федерациясының президенті Шахмұрат Мүтәліп пен бокстан Олимпиада чемпионы Бақтияр Артаевтың қатысуымен кездесу өтті.

«Басқосудың негізгі мақсаты – Бақтияр Артаевқа Вэл Баркер кубогын табыстау», - деп жазды федерация.

Вэл Баркер Кубогы – Олимпиада ойындарындағы үздік боксшыға берілетін жүлде. 2004 жылы Афинадағы бәсекеде чемпион атанған Бақтияр Артаев жарыстың үздік былғары қолғап шебері деп танылды.

Айта кетейік, Артаев өз кубогын бірнеше жыл бұрын халықаралық ұйымға тапсырып, осы мәселе шешімін таппаған еді. Қазақстан бокс федерациясы әлемдік спорттағы құнды жәдігер саналатын жүлдені қайтару үшін нақты қадамдар жасады.