«Басынан тепкен»: Қостанайда 61 жастағы науқасты ұрып-соққан санитар төрт жылға сотталды

Қостанайдағы Уақытша бейімдеу және детоксикация орталығында 61 жастағы зейнеткерді соққыға жыққан санитар төрт жылға бас бостандығынан айырылды. Ол өз кінәсін мойындаған жоқ. Бұл туралы қаладағы №2 сотта хабарланды, деп жазады sadaq.kz.

Сот деректеріне сәйкес, 2025 жылдың 27 шілдесінде сағат 18:30 шамасында санитар Т. палатада «жеке араздық негізінде, қасақана түрде» жәбірленушінің басынан бір рет қатты теуіп, денесіне үш соққы жасаған. Науқас өміріне қауіпті ауыр дене жарақатын алған.

Мемлекеттік айыптаушы Т.-ға бес жыл бас бостандығынан айыру және он жыл бойы пациенттермен жұмыс істеу құқығынан айыру жазасын тағайындауды сұрады. Айыпталушы  болса, толық ақтауды талап еткен. Жәбірленуші мен оның өкілі қатаң жаза сұраған.

Сот істі қарау барысында жеңілдететін немесе ауырлататын мән-жайлардың жоқ екенін, айыпталушының бұрын сотталмағанын анықтады. Нәтижесінде оған орташа қауіпсіздік деңгейіндегі мекемеде жазасын өтеумен төрт жыл бас бостандығынан айыру және бес жыл бойы пациенттерге күтім жасау саласында жұмыс істеуге тыйым салу жазасы тағайындалды.

Азаматтық талап шағымы ішінара қанағаттандырылды — сот моральдық шығынды өндіруді міндеттеді. Үкім әлі заңды күшіне енген жоқ.