Шавкат Рахмонов Геннадий Головкин туралы ойын айтты

Қазақстандық жауынгер Шавкат Рахмонов UFC 310 турнирі қарсаңындағы баспасөз мәслихатында Геннадий Головкин туралы пікір білдірді. Бұл туралы KAZ.NUR.KZ YouTube желісіндегі "Чейл Соннен на русском" арнасына сілтеме жасап хабарлайды.

"Геннадий Головкин – мен үнемі үлгі тұтатын тұлғалардың бірі. Оны Қазақстанда бәрі біледі. Біз оның жекпе-жектерін тамашалап, оған жанкүйер болдық. Қазір ол спорттық мансабын аяқтағанымен, елімізде спортты дамыту жолында үлкен істер атқарып жатыр", - деді Шавкат Рахмонов.

Айта кетейік, Геннадий Головкин өзінің соңғы жекпе-жегін 2022 жылдың қыркүйегінде өткізген болатын. Қазіргі уақытта ол Қазақстанның Ұлттық Олимпиада комитетінің президенті қызметін атқаруда. Дегенмен ол ресми түрде бокстан кеткені туралы мәлімдеме жасаған жоқ.

Естеріңізге сала кетейік, Шавкат Рахмонов 8 желтоқсанда UFC 310 турнирі аясында ирландиялық файтер Иэн Мачадо Гэрримен кездеседі.