SpaceX Starship ұшырды, бірақ үдеткішті қайтара алмады
SpaceX Starship ғарыш кемесін орбитаға шығарды, бірақ Super Heavy үдеткішін ұстап алу сәтсіз аяқталып, ол Мексика шығанағы үстінде жарылды. Компания алғаш рет екі сатыны да қайта пайдалануды жоспарлаған еді.
SpaceX 13 қарашада (жұма) Техастағы Starbase ғарыш айлағынан Starship мегаракетасын сәтті ұшырды, бірақ алғаш рет екі сатыны да қайта пайдалану әрекеті сәтсіз аяқталды: Super Heavy үдеткішін ұстап алу мүмкін болмай, ол Мексика шығанағы үстінде жарылды. Бұл туралы DW, CNBC және The Guardian хабарлады.
Бұл Starship-тің 15-ші сынақ ұшуы болды. Әлемдегі ең үлкен және қуатты зымыран жүйесі саналатын Starship-тің биіктігі 124 метр, ол 33 Raptor қозғалтқышы бар төменгі үдеткіштен және жоғарғы ғарыш кемесінен тұрады.
Алғашқы қос қайтару әрекеті сәтсіз аяқталды
Компания алғаш рет екі сатыны да мұнарадағы механикалық қолдармен (chopsticks) ұстап алуды жоспарлаған. Алайда үдеткіш қону траекториясынан ауытқып, қауіпсіздік мақсатында Мексика шығанағына бағытталды, сонда жарылды. Себебі әлі белгісіз. SpaceX өкілі Дэн Хуот: «Оны неге қайтара алмағанымызды әзірге білмейміз», — деді.
Жоғарғы саты (Starship кемесі) орбитаға шығып, 26 Starlink спутнигін орналастырды. Ол Жерді шамамен 14 рет айналып, сенбі күні Жерге оралып, сол механикалық қолдармен ұсталуы керек. Егер сәтті болса, бұл жоғарғы сатының алғаш рет қайтарылуы болмақ.
Бұған дейін SpaceX үдеткішті бірнеше рет сәтті қайтарған, бірақ жоғарғы саты әрқашан мұхитқа құлаған. Толық қайта пайдалану — зымыран ұшыру құнын төмендетудің кілті. Илон Маск бұл қадамды «өмірді көп планетаға тарату үшін қажетті маңызды серпіліс» деп атаған.
NASA 2028 жылы астронавттарды Айға қондыру үшін SpaceX-пен келісімшарт жасасқан. Алдағы уақытта компания Starship ұшыруларын аптасына бір ретке дейін жеткізуді жоспарлап отыр.
