Қазақстан Каспий теңізін тереңдетуге 42 млрд теңге жұмсамақ

Транскаспий халықаралық көлік бағытын дамыту үшін Ақтау портының акваториясында теңіз түбін тереңдету жұмыстарына 42,1 млрд теңге жұмсалады. Бұл туралы премьер-министр Олжас Бектеновтің Сенат депутаттарына берген жауабында айтылған, деп хабарлайды Azattyq Rýhy.

Сенаторлар Ақтау портының акваториясында түп тереңдету жұмыстарын қаржыландыру мәселесі бойынша депутаттық сауал жолдаған болатын. Олар Транскаспий халықаралық көлік дәлізінің толыққанды жұмыс істеуіне Каспий теңізі деңгейінің төмендеуі кері әсер етіп отырғанын жеткізді. 

"Ақтау халықаралық теңіз сауда порты" ұлттық компаниясы жобалау-сметалық құжаттаманы әзірледі және 2024 жылғы желтоқсанда мемлекеттік сараптаманың оң қорытындысын алды. Аталған қорытындыға сәйкес жұмыстардың жалпы құны – 42,1 млрд теңге, оның бірінші кезегіне (2025 ж.) – 20,6 млрд теңге. Ақтау портының акваториясында түп тереңдету жұмыстарын 2025 жылы жүргізудің маңыздылығын назарға ала отырып, қаржыландыру мәселесін 2025 жылғы республикалық бюджетті нақтылау кезінде пысықтау жоспарланып отыр", - деді Үкімет басшысы.