19 адам жарақаттанды: Ла-Манш тоннелінде шағын автобус пойызға соғылды
Ла-Манш тоннелінің француз жағында жүк көліктерінің жүргізушілерін тасымалдаған шағын автобус пойызға соғылып, 19 адам зардап шекті. Екі адам ауыр жарақатпен ауруханаға жеткізілді.
Бейсенбі күні Ла-Манш тоннелінің француз кіреберісінде, Кале маңындағы Кокель қаласында жүк көліктерінің жүргізушілерін тасымалдаған шағын автобус пойызға соғылып, 19 адам жарақаттанды. Бұл туралы ABC News пен BBC хабарлады.
Оқиға жергілікті уақытпен сағат 19:27-де болған. Шағын автобус тоннельге кірер алдындағы платформада тұрған пойызға соғылған. Пойыз жүк көліктерін артып, жөнелтілгелі жатқан. Алдын ала мәлімет бойынша, автобус бағытынан ауытқып, қозғалып бара жатқан пойыздың бүйіріне соқтығысқан.
Жарақат алғандардың барлығы — ер адамдар, олар әртүрлі ұлт өкілдері. Екі адамның жағдайы ауыр, бірақ өміріне қауіп төніп тұрған жоқ. Олар тікұшақпен ауруханаға жеткізілді. Қалған 17 адам жеңіл жарақат алды.
Қызмет 90 минутқа тоқтатылды
Оқиға орнына 200-ге жуық құтқарушы мен жедел жәрдем қызметкерлері жетті. Тоннель арқылы көлік тасымалдайтын Le Shuttle пойыздарының қозғалысы 90 минутқа тоқтатылды, кейін біртіндеп қалпына келтірілді. Eurostar жолаушылар пойыздары мен жүк тасымалы зардап шеккен жоқ.
Жергілікті билік өкілі Агата Кюридің айтуынша, бұл платформада мұндай оқиға алғаш рет тіркеліп отыр. Апаттың себебі әзірге белгісіз, тергеу жүргізіліп жатыр.
Ла-Манш тоннелі 1994 жылы ашылған, өткен жылы ол арқылы 3,4 миллион көлік өткен. Бұл Еуропадағы ең маңызды көлік дәліздерінің бірі.
