Алматыда танымал заңгер қамауға алынды
Алматыда Instagram желісінде танымал заңгер Әділетхан Молдахан ұсталды. Бұл туралы қалалық Полиция департаменті мәлімдеді.
Ведомствоның дерегінше, азамат М.-ға қатысты жалған ақпаратты әдейі тарату фактісі бойынша сотқа дейінгі тергеу басталған.
Қазіргі уақытта күдікті уақытша ұстау изоляторына қамалған. Әділетхан Молдахан әлеуметтік желілерде айыппұлдарды жою жолдары мен полиция қызметкерлерімен қарым-қатынас туралы кеңестері арқылы танымал болған. Бұған дейін ол патрульдік полицияда қызмет атқарған.
Айта кетейік, ол Алматыдағы әл-Фараби даңғылы бойында үш адам қаза тапқан жол-көлік оқиғасынан кейін әлеуметтік желіде видео жариялап, оқиғаға қатысты өз нұсқасын айтқан.
Сондай-ақ 30 наурыз күні өзін жәбірленуші тараптың өкілі ретінде таныстырған.
Бейресми мәліметтерге сәйкес, жақын уақытта тергеу соты күдіктіге қатысты бұлтартпау шарасын таңдауы мүмкін.
