Беларусь блогерінен ақша бопсалаған түркістандық полицейлер жұмыстан қуылды

Бұған дейін әлеуметтік желіде блогер Александр Гулько өздерін Түркістан облысындағы патрульдік полиция негізсіз тоқтатып, ақша талап еткенін айтып, видео жариялаған болатын.

Ішкі істер министрінің орынбасары Игорь Лепеха Беларусьтен келген туристерді негізсіз тоқтатып, 200 мың теңге алған патрульдік полицейлер жұмыстан қуылғанын хабарлады. 

Туристердің айтуынша, полицейлер оларды Қазақстанның техникалық тексерісінен өтпегені және бейнебақылау камерасына түскені үшін негізсіз айыптаған. Егер сұраған қаражатты берсе, жолда ешкімнің тоқтатпайды деп уәде етіпті.

Осы факті бойынша қылмыстық іс қозғалды. Сондай-ақ бөлімше басшылығына қатысты қызметтік тергеу басталды. Бұл жағдайды Ішкі істер министрінің орынбасары Игорь Лепеха растады. 

«Іс қозғалды. Бейнежазбадағы полиция қызметкерлері жұмыстан қуылды», - деді ол.

Бұған дейін аталмыш оқиға бойынша іс қозғалып, бөлімше басшылығына қатысты қызметтік тергеу басталғаны хабарланған.