Биік ғимараттар құлады: Мяньма мен Тайландта жойқын жер сілкінісі болды

Қытай Сейсмикалық стансалар желісінің ресми мәліметіне сәйкес, 28 наурыз күні Бейжің уақытымен 14:20-да (Астана уақытымен 11:20) Мьянма аумағында (солтүстік ендік 21.85°, шығыс бойлық 95.95°) магнитудасы 7,9 балдық жер сілкінісі болды. Жерасты дүмпулерінің тереңдігі – 30 км.

Синьхуа агенттігінің Мьянмағы тілшісінің жазуынша, елдің ең ірі қаласы – Янгонда жер сілкінісі қатты сезілген.

Сондай-ақ, сілкініс дүмпуі Таиланд астанасы Бангкок пен Лаос астанасы Вьентьянда да анық байқалған.

Қазірше зардап шеккендер мен материалдық шығындар туралы ресми ақпарат жоқ.

Chinanews агенттігінің хабарлауынша, Қытайдың Юньнань провинциясындағы Баошань, Сишуанбаньна-Дай автономиялық облысы, Пуэр және Куньмин қалаларының тұрғындары да күшті жер сілкінісін анық сезген. 

CNN-нің жазуынша, алғашқы жер сілкінісінен 12 минут өткенде аймақта магнитудасы 6,4 болатын жерасты дүмпуі тіркелген.

"Біз шамамен бір минуттай жер сілкініп тұрғанын сездік. Сосын ғимараттан жүгіріп шықтық. Басқа адамдардың да жүгіріп шығып жатқанын көрдік. Бұл кенеттен әрі қатты болды", - дейді басылымға атын жасырын қалғанын өтінген Мьянма астанасы Янгон қаласының тұрғыны.

Басылым тілшілерінің хабарлауынша, жерасты дүмпулері Таиланд астанасы Бангкокта да сезілген.

Sky News-тің жазуынша, Бангкокта жүздеген адам ғимараттарды тастап шыққан. Әзірге жер сілкінісінен зардап шеккендер немесе қаза болғандар туралы ақпарат жоқ.