ЕО Қытайдан гибридті көлік импортын шектеуге тырысады
Еуроодақ сауда комиссары Марош Шефчович Қытайға барып, күніне 1 млрд еуроға жеткен тапшылықты азайту үшін гибридті электромобильдер импортын шектеуді талқылайды.
Еуроодақтың сауда комиссары Марош Шефчович бастаған делегация сәрсенбіде Қытайға аттанып, бейсенбі-жұма күндері Пекинде екі күндік келіссөздер жүргізеді. The Guardian мен Al Jazeera хабарлауынша, басты мақсат – Қытайдан Еуропаға арзан гибридті электромобильдер экспортын шектеу арқылы күніне шамамен 1 миллиард еуроға жететін сауда тапшылығын азайту.
Еуроодақ Қытайға гибридті көліктерді ерікті түрде шектеуді ұсынған, бірақ Al Jazeera-ның хабарлауынша, Пекин бұл ұсынысты қабылдамаған. Енді Брюссель Қытайдан импортқа біржақты шектеу қоюға келісімін алуға үміттенеді. Бұған дейін ЕО 2024 жылдың қазанында қытайлық электромобильдерге баж салғаннан кейін гибридті модельдер экспорты күрт өскен.
Соңғы апталарда Германия канцлері Фридрих Мерц пен Франция президенті Эммануэль Макрон Қытайға қарсы қатаң сауда құралдарын қолдануға шақырды. Олар ЕО-ға сауда агрессиясына бірнеше күн ішінде жауап беруге мүмкіндік беретін жаңа құрал әзірлеуді ұсынды. Қытай бұл әрекеттерді протекционизм деп атап, егер шектеулер енгізілсе, «қатаң жауап» беретінін мәлімдеді.
Келіссөздер келесі аптада Брюссельде өтетін ЕО көшбасшыларының саммитіне дейін аяқталуы тиіс. Шефчович «нақты, мағыналы және өлшенетін» нәтижелерге қол жеткізуді көздейді. Егер тараптар келісімге келе алмаса, Еуроодақ гибридті көліктерге квота енгізуі мүмкін.
