Гүлнар Бажкенова 8 жылға сотталды

Алматының Бостандық аудандық сотында бүгін, 18 тамызда Гүлнар Бажкеноваға қатысты үкім жарияланды, деп хабарлайды Sadaq.kz.

Оған мынадай айыптар тағылған:

— заңсыз кәсіпкерлікпен айналысу (ҚР ҚК 214-бабы 2-бөлігінің 2-тармағы);

— сеніп тапсырылған бөтен мүлікті иемдену немесе ысырап ету (ҚР ҚК 189-бабы 4-бөлігінің 2-тармағы);

— көрінеу жалған ақпарат тарату (ҚР ҚК 274-бабы 2-бөлігінің 1 және 3-тармақтары).

Алдыңғы сот отырысында прокурор Қуаныш Қанапиянов тағылған айыптардың жиынтығы бойынша Гүлнар Бажкенованы сегіз жылға бас бостандығынан айыруды сұраған еді. Сондай-ақ жазаны өтеуді екі жылға кейінге қалдырып, оны бес жыл бойы журналистік, қоғамдық және басшылық қызметпен айналысу құқығынан айыруды ұсынған.

Судья Елена Кван Бажкенованы сегіз жылға бас бостандығынан айырып, жазаны өтеуді екі жылға кейінге қалдыру туралы үкім шығарды.

Бажкенова өзіне тағылған айыптардың ешқайсысын мойындамады.

Шілде айының басында редакцияның (ЖШС) мүдделер қайшылығына байланысты бұл сот процесін жарияламау туралы шешім қабылдағанын хабарлаған едік. Өйткені жарияланымдар қаралып жатқан істің қабылдануына қандай да бір ықпал етуі немесе редакцияның біржақты ұстанымы бар деген пікір қалыптастыруы мүмкін еді.