«Қазақша сөйле»: қазақтілді балаларға арналған жаңажылдық ертеңгілікке орыстілді Аяз ата шақырған

Threads желісінің пайдаланушысы қазақтілді балаларға арналған жаңажылдық ертеңгілікте Аяз ата мен Ақшақардың мерекені орыс тілінде жүргізгеніне наразы екенін жазды, деп хабарлайды Sadaq.kz.

Әйелдің айтуынша, шараға шамамен 100 адам жиналған, ал ұйымдастыру жұмыстарымен мекеменің өзі айналысқан.

«Тамада мерекені қазақ тілінде жүргізді! Бірақ… орыстілді Аяз ата мен Ақшақар  шақырған! Ал Instagram парақшаларында олар қазақтілді Аяз Ата мен Ақшақар болып көрсетілген! Бүкіл зал ашулы болды, бәрінің көңіл күйі түсіп кетті, ойындарға қатысуға ешкімнің зауқы соқпады. 15 минуттай ғана жүріп, кетіп қалды. Бүкіл зал хормен “қазақша” деп айтты. Ақшақар қазақша сөйлеуге тырысты. Мекеме мен ұйымдастырушылар өз қателігін түсінеді деп ойлаймын», - деп жазады ата-ана.

Алайда жазбаның астындағы пікірлерде әйел хейт пен сынға ұшыраған. Оқырмандар оны ұлтаралық араздықты қоздыруда айыптап, назарын маңыздырақ мәселелерге аударуға кеңес берген.

«Аяз ата мен Ақшақар сол жерде бұрылып кетіп қалуы керек еді, өздерінің көңілдерін өздері көтерсін»;

«Неге осы тақырыпта сонша арандату бар? Бізде одан да маңызды мәселелер жетерлік: шағын және орта бизнес құлдырап жатыр, келесі жылы жоғары инфляция күтіп тұр. Бізде кешкі уақыт 16:30-да басталады, ал сіздерді осы нәрсе алаңдата ма?»;

«Мен бала кезімнен түрлі ұлт өкілдерімен доспын: қазақтар, ұйғырлар, шешендер, әзербайжандар, түріктер және тағы басқалар. Біз ешқашан кімнің қай ұлт екенін сұрамайтынбыз, ал мұнда Threads-та ұлттық қозғалыстарды әдейі қоздырып жатқандай. Біз ондаған жыл бойы барлық ұлтпен тату тұрдық, ешқандай проблема болған жоқ»;

«Барлығы орыс тілін түсінеді ғой, TikTok, Instagram қарап отыр. Неге әдейі қинау керек? Өзіне де, өзгеге де көңіл күйді бұзды. Бәрібір ештеңе шықпады», - деп жазады қолданушылар.