Өлім жазасына кесілген Шейх Хасина желтоқсанда елге оралуды жоспарлап отыр
Бангладештің бұрынғы премьер-министрі Шейх Хасина өлім жазасына кесілгеніне қарамастан, желтоқсан айында елге оралу үшін жаңа төлқұжат сұрады.
Бангладештің қуғындағы бұрынғы премьер-министрі Шейх Хасина желтоқсан айында елге оралуды жоспарлап отыр. Ол осы аптада жаңа төлқұжат пен ұлттық жеке куәлік алу үшін өтініш берді, деп хабарлайды The Guardian, BBC және ABC News.
Хасина 2024 жылдың тамызында студенттердің жаппай наразылығынан кейін биліктен құлап, Үндістанға қашып кеткен. Былтыр қарашада Бангладештегі арнайы трибунал оны адамзатқа қарсы қылмыстары үшін өлім жазасына кесті. Билік оны «террорист» деп атап, Үндістаннан экстрадициялауды талап етіп келеді, бірақ Дели бұл өтінішті орындамай отыр.
Хасинаның оралу жоспары
Лондондағы Matrix Chambers заң фирмасының хаты Бангладештің Делидегі дипломатиялық миссиясына жіберілді. Онда Хасинаның азаматтығына сүйене отырып, құжаттарды «жедел түрде» рәсімдеу сұралған. Хасинаның көмекшісі Абу Обайда Арин: «Бұл оның елге оралуы жолындағы маңызды қадам. Ол желтоқсанға дейін Бангладешке оралуға бел буды», – деді.
Хасинаның партиясы «Авами лигасы» Бангладеште тыйым салынған, мыңдаған мүшелері түрмеде отыр. Соған қарамастан, қуғындағы партия жетекшілері елге оралып, саяси күрес жүргізуге дайын екендерін айтуда. Кейбір жоғары лауазымды тұлғалар оралып, қамауға алынған.
Елде билікке келген жаңа үкімет инфляциямен күресіп жатыр, ал «Авами лигасы» мұны саяси пайдаға асыруға тырысуда. Хасина өзін кінәсіз санап, трибуналдың заңдылығын жоққа шығаруда. Associated Press-ке берген сұхбатында ол: «Егер өлім менің тағдырым болса, мен өз елімнің топырағында, өз халқымның арасында өлгенді қалаймын», – деді.
