«Әсері атом бомбасынан кем емес»: депутат TikTok-қа шектеу қоюға шақырды
Қазақстан Республикасы Парламентінің Мәжіліс депутаты Жанарбек Әшімжан Премьер-министр Олжас Бектеновке TikTok желісіне шектеу қою туралы депутаттық сауал жолдады, деп хабарлайды sadaq.kz.
Депутат TikTok-тың жасөспірімдерге кері әсерін атап өтіп, платформаны реттеудің маңыздылығын көтерді. Оның айтуынша, әлеуметтік желіде ұлттық құндылықтар мен әдепке қайшы келетін, балалардың санасына зиян тигізетін контент көбейген.
«Бүгінде балалардың әліппесі – әлеуметтік желі, емізігі – TikTok, бесік жыры – Instagram болып барады. Ұрпақ тәрбиесімен ата-ана емес, гаджеттер айналысуда», – деді депутат.
Әшімжан TikTok-қа қатысты шектеу шараларын әлем елдерінің енгізіп жатқанын еске салып, Қазақстанда да балалардың бұл платформаны пайдалануын заңмен реттеуді ұсынды.
Депутат Үкіметке келесі шараларды қолға алуды ұсынды:
TikTok-тағы әдепке, ұлттық құндылықтарға және балалардың психологиясына зиян келтіретін барлық контентке шектеу қою.
TikTok-ты кәмелеттік жасқа толмаған балалардың пайдалануына заң жүзінде шектеу қою немесе толық тыйым салу механизмін қарастыру.
Бұл мәселе бойынша Үкіметтен заңнамада көрсетілген мерзім ішінде жауап беру сұралды.
