Қытай көліктерінің экспанциясы: Honda мен Nissan бірігіп күн көретін болды

Қытай көліктерінің экспанциясы әлемдік алпауыттарды тізе бүктіре бастады. Жапонияның ең ірі автокөлік өндірушілерінің арасында екінші және үшінші орындарды өзара бөлісіп отырған Honda мен Nissan компаниялары бірігіп жаңа холдинг құруды жоспарлап отырғандарын хабарлады. 

Reuters агенттігінің хабарлауынша,  қос алпауыттың мұндай қадамға баруына Қытайдың электромобильдер нарығындағы қарқынды даму мен ішкі сұраныстың төмендеуі себеп болған. 

Екі компанияның бірлесіп жұмыс істеуі биыл көктемде басталған. Тамыз айында олар электромобильдерге арналған батареялар мен технологияларды бірлесіп жасауға келіскен. Өткен жылы олар бірге 7,4 млн автокөлік сатқан.

Алайда соған қарамастан, Nissan-ның қаржылық жағдайы қиындап отыр. Қазіргі фискалдық жылдың алғашқы жартысында компанияның таза пайдасы 90%-дан астамға төмендеді, ал операциялық пайда бойынша болжам 70%-ға қысқарған. 

Сол секілді Nissan компаниясының да халі мүшкіл. Кезінде танымал болған Nissan бүгінде екі-ақ электрлі көлік түрін ұсынып отыр. Көптеген сарапшылар компанияның 2026 жылға дейін гибридті модельдер қатарын 16-ға жеткізу туралы жоспарына күмәнмен қарай бастаған.

Яғни Nissan-ның ағымдағы қаржылық жағдайы тәуелсіз өмір сүруге мүмкіндік бермейді. Сондықтан, компания жақын арада серіктес іздеуге мәжбүр болуы мүмкін. Ал Honda электромобиль стратегиясында АҚШ-тағы GM және Қытайдағы бірлескен кәсіпорындармен бірлесіп күн көруі мүмкін.