Адам өмірін құтқарып қалғаннан артық бақыт жоқ - Өрт сөндіруші

Төтенше жағдай орын ала қалса барлығымыз ең алдымен құтқарушылардан көмек күтеміз. Олардың бір күні бір күніне ұқсамайтын қауіп пен қызықтан тұрады. Бейбіт күннің батырлары атқаратын қызметке тереңірек бойлау үшін жас құтқарушы Жандосты әңгімеге тартып көрдік. 

Қазыбаев Жандос Ғабитұлы Ақтөбе қаласының тұрғыны, бүгінде өңіріне қызмет етіп, құтқарушылық міндетті атқарып жүр. 

Мектеп пен университетті бітірген соң әскерге аттандым. Сол жақта жүріп әскери өмірге деген қызығушылығым оянды. Бірақ әскери адам болудан гөрі құтқарушылық қызметті жүрегім көбірек қалады. Осылайша әскерден оралған соң Ақтөбе қаласына қарасты №4 Өрт сөндіру бөліміне жұмысқа орналыстым. Бүгінде өрт сөндіруші-құтқарушы, кіші сержант ретінде еңбек етіп жүрмін. 

21 жастағы Жандос бұл қызметтің жауапкершілік жүгін толық сезінетінін және оңай ештеңе болмайтынын айтады. 

Біздің жұмыс жауапкершілікпен қатар жанкештілікті талап етеді. Құтқару туралы қоңырау түскен сайын апат шыққан аймаққа жеткенше бойымызды бір түсініксіз сезім билейді. Алайда жанған өртке еніп кеткен кезде оның бәрін ұмытып, тек құтқаруды ғана ойлап тұрасың. Алаулаған жалын мені де шарпып кетуі мүмкін еді ғой деген ой барлығы аяқталған соң ғана келеді. Осылай жұмыс күндері өте береді. Біліктілік пен шеберлікті, сабырлылық пен салқын сананы қатар алып жүрсең, ешқандай қауіп жоқ. Біз барлығына дайын сарбазбыз, бір орында тоқтап қалмай үнемі шынығып, жаттығып жүреміз. 

Кейіпкеріміздің сөзінше, адам өмірін құтқарып қалғаннан артық бақыт жоқ. 

Құтқарушылардың күнделікті істеп жүрген ісі біреулер үшін қорқынышты көрініп, үрей тудыруы мүмкін. Бірақ біз алғысқа бөленіп жүрген адамдармыз. Адам өмірін ажалдан, басқа да зақымнан арашалап қалу сөзбен жеткізе алмайтын ерекше сезім. Қиын сәтте қалған жанды қауіпсіз аймаққа көшіргеннен кейін алатын алғысымыз бізді шын бақытқа бөлеп, болған жағдайды ұмыттырып жібереді. 

Жандос Ғабитұлы құтқарушылардың жағдайы жыл сайын жақсарып келе жатқанын да жасырмай айтты. 

2022 жылы қабылданған заңға сәйкес, құтқарушылардың жалақысы кезең-кезеңімен көтеріліп жатыр. Әр жыл сайын белгілі бір пайызға өсуде. Одан бөлек 2023 жылы Мемлекет басшысының тапсырмасын іске асыру шеңберінде Төтенше жағдайлар министрлігінің әскери қызметшілері мен қызметкерлерінің жалақысы орта есеппен 40%-ға өсті. Мұның барлығы оңай емес жұмысымызды жақсырақ атқаруға мотивация беретіні сөзсіз. 

Айта кетейік, өткен жылы денсаулық пен өмірге зиян келтіру қаупімен байланысты жұмыс үшін құтқарушыларға лауазымдық жалақысының 70%-ы мөлшерінде қосымша ақы белгіленді. 

Сөз соңында жас құтқарушымыз елімізде оқыс оқиғалар мен табиғи апаттар болмауын тілеп, ел халқынан сақтанып жүруді сұрады. Шұғыл қоңыраулар аз түскенін тілеп, түсе қалған жағдайда көмекке әрдайым дайын екенін жеткізді.