Әкімді сынаған жазбаға лүпіл басқан: Министр Нұржан Нұржігітовтің басы бәлеге қалды

БАҚ беттерінде Су ресурстары және ирригация министрі Нұржан Нұржігітовтің Жамбыл облысының әкімі Ербол Қарашөкеевті сынаған постқа лайк басқаны туралы ақпарат тараған еді

Осыған байланысты бүгін Сенат кулуарында журналистер министрді қоршап алып, не үшін Жамбыл облысының әкімі Ербол Қарашөкеевті сынаған постқа лүпіл басқанын сұрап, қара терге түсірді, деп хабарлады sadaq.kz ақпарат порталы.

«Лайк басқаным есімде жоқ. Бірақ әлеуметтік желіні қарап отырған кезде басылып кеткен шығар», - деп жауап берді министр.

Журналистер сондай-ақ, «Қарашөкеевтің жұмысына көңіліңіз толмай ма? Теріс көзқарасыңыз жоқ па?" деп те сұрақ қойған.

Бұл сұраққа да Су ресурстары және ирригация министрі «Қарашөкеевке қатысты теріс көзқарасының жоқ екенін, байқамай басылып кеткенін» айтып ақталды. 

Еске сала кетейік, бұған дейін Жамбыл облысы әкімінің әлеуметтік желідегі жазбасы қызу талқыланған еді. Онда Ербол Қарашөкеевтің жаңа жылдағы 4 күн демалыста екі кітап оқып тастағаны туралы жазылды.