Алматы облысында қабаған ит баланың құлағын жұлып алған (ФОТО)

Қарасай ауданының Жалпақсай ауылында үш төбет: бір питбуль мен екі ротвейлер 10 жастағы балаға шабуыл жасады, деп хабарлайды turkystan.kz.

Иттер жеке аумақтан шығып кетіп, көшеде келе жатқан баланы жүргіншілердің көз алдында талап тастаған. Куәгерлердің айтуынша, екі ер адам араша түсіп, зорға дегенде баланы құтқарып қалған. Бала ауыр жарақат алған: бір құлағы жұлынып, денесі тістелген. Қазір ол жансақтау бөлімінде жатыр.

Баланы құтқару кезінде жергілікті тұрғындардың бірі питбулді атып өлтіруге мәжбүр болған. Иттердің иесі өз кінәсін мойындамай отыр.