Ертең Украина мен АҚШ келіссөздер өткізеді

АҚШ пен Украина ресми өкілдері 11 наурызда келіссөздер өткізеді. Тараптар екіжақты пайдалы қазбаларды өндіру туралы келісімге және соғысты аяқтау жолдарына назар аударуы керек, деп хабарлайды BAQ.KZ.

Бұл келіссөздер – Украина президенті Владимир Зеленскийдің Ақ үйге жасаған сәтсіз сапарынан кейінгі алғашқы ресми кездесу. Алдымен Зеленский Сауд Арабиясына мұрагер ханзада Мұхаммед бен Салманмен кездесуге барады. Содан кейін Украина мен АҚШ өкілдері Ресеймен соғысты тоқтату мәселесін талқылайды.

Зеленский сейсенбі күнгі келіссөздерге қатыспайтынын мәлімдеді. Оның орнына украин делегациясын әкімшілігінің басшысы, сыртқы істер және қорғаныс министрлері, сондай-ақ президент әкімшілігінің жоғары лауазымды әскери шенеунігі басқарады.

«Біздің тарапымыздан конструктивті диалог жүргізуге толықтай дайынбыз және қажетті шешімдер мен қадамдарды талқылауға, келісуге үміттенеміз», – деп жазды Зеленский X платформасында.

АҚШ шенеуніктері бұл кездесуді Киевтің соғысты тоқтату үшін Ресейді қандай да бір елеулі шарттарға көндіруге дайын ба екенін анықтау үшін пайдаланбақ.

«Егер сіз «Мен бейбітшілік қалаймын» десеңіз, қандай да бір ымыраға келуге дайын болуыңыз керек», – деді келіссөздер алдында америкалық ресми тұлғалардың бірі.

Тағы бір америкалық өкіл: “Біз украиндықтардың жай ғана бейбітшілік емес, шынайы және жүзеге асатын бейбітшілікке мүдделі екенін білгіміз келеді,” – деп қосты.

АҚШ президенті Дональд Трамп алдағы келіссөздерден жақсы нәтиже күтетінін және АҚШ-тың Киевпен барлау мәліметтерін алмасу шектеулерін “дерлік” алып тастағанын мәлімдеді.

Трамптың арнайы өкілі Стив Виткофф бұл келіссөздердің мақсаты “бейбітшілік келісімінің құрылымын әзірлеу және бастапқы уақытша бітім жасау” екенін айтты.

Өз кезегінде, Зеленский әуеде және теңізде соғысты тоқтатуға, сондай-ақ тұтқындармен алмасуға шақырды.

Оның айтуынша, бұл Ресейдің соғысты аяқтауға қаншалықты дайын екенін сынайтын қадам болмақ. Алайда, Мәскеу Ұлыбритания мен Франция ұсынған уақытша бітім идеясынан бас тартты. Кремль бұл тек Киевке демалыс беру және оның әскери жеңілісінің алдын алу әрекеті деп мәлімдеді.

Еске салайық, 28 ақпанда Украина президенті Владимир Зеленский АҚШ президенті Дональд Трамп және вице-президент Джей Ди Вэнспен көпшілік алдында жанжалдасып, Ақ үйден мерзімінен бұрын кетіп қалған болатын. Трамп Зеленскийді АҚШ-ты құрметтемейді және “бейбітшілікке дайын емес” деп айыптады. Осыдан кейін көптеген еуропалық көшбасшылар мен ЕО басшылары Зеленский мен Украинаны ашық қолдады.