Иранда қаралы жиынға қатысушыларға оқ атылды: Бірнеше адам жараланды (ВИДЕО)

Иранның Абданан қаласында қауіпсіздік күштері қаңтардағы жаппай наразылықтар кезінде қаза тапқандарды еске алу рәсіміне жиналған халыққа оқ жаудырды. Бұл туралы Sadaq.kz сайты Iran International агенттігіне сілтеме жасап хабарлайды.

Оқиға сейсенбі күні наразылық құрбандарының қазасына 40 күн толуына орай ұйымдастырылған қаралы жиын кезінде орын алған. Желіде тараған бейнежазбалардан күштік құрылымдардың қаралы қауымға оқ жаудырғаны көрінеді. Атыс салдарынан бірнеше адам жарақат алған.

АҚШ-тың Иран бойынша бұрынғы жоғары лауазымды шенеунігі Эллиот Абрамс аталған оқиғаға қатысты өз пікірін білдірді. Ол Иран режимінің қазіргі жағдайын былай деп сипаттады:

«Бүгінде бұл режимнің билікте тек өз азаматтарын өлтіру арқылы ғана отырғаны бұрынғыдан да анық байқалады».

Сондай-ақ Абрамс Иранның ішкі әлсіздігіне қарамастан, биліктің халықаралық деңгейде шегініс жасауға ниетті емес екенін айтты:

«Олар, бәлкім, біз әлсіздік таныта алмаймыз, сондықтан ымыраға келе алмаймыз деп ойлайтын шығар. Сол себепті қисынды келісімге келу мүмкін екеніне сену қиын».

Мақалада атап өтілгендей, Иран экономикасы құлдырап, валюта құны төмендегеніне қарамастан, режим ядролық және зымырандық бағдарламалары бойынша ешқандай жеңілдік жасағысы келмейді.