Сицилияда қос торнадо: ондаған адам жарақат алды
Сицилияның батысындағы Марсала қаласына екі торнадо соғылып, ондаған адам жарақат алды. Мектеп те зақымданып, 273 оқушы эвакуацияланды.
The Guardian, BBC және Euronews хабарлауынша, жұма күні Сицилия аралының батысындағы Марсала қаласына теңізден екі торнадо соғылып, ондаған адам жарақат алды. Қаладағы ғимараттар, оның ішінде мектеп те қирап, көліктер аударылды.
Алғашқы мәліметтер бойынша, кем дегенде 11 адам ауруханаға жеткізілді. Ең ауыр жарақат алған 70 жастағы ер адам Мазара-дель-Валло ауруханасына жансақтау бөліміне түсті. Торнадо мектепті де шарпып, 6 оқушы жеңіл жарақат алды. Сол сәтте мектепте 273 оқушы болған, олардың барлығы қауіпсіз эвакуацияланды. Ұшқышсыз ұшу аппаратымен түсірілген кадрларда мектептің терезелері сынып, парталар аударылғаны көрінеді.
Петросино қаласында да зардап шеккендер бар
Маңайдағы Петросино қаласында торнадо бір көлікті жыраға лақтырып, ішіндегі екі адам жарақат алып, ауруханаға жеткізілді. Жергілікті БАҚ хабарлауынша, дауыл салдарынан аймақтағы үйлер мен фермалар да зақымданған. Апаттан кейін құтқару қызметтері зардап шеккендерге көмек көрсетуде.
Сарапшылар мұндай құбылыстардың сирек кездесетінін, бірақ Жерорта теңізінің жылынуына байланысты күшейгенін айтады. Соңғы жылдары Оңтүстік Италия тұрғындары "медикан" деп аталатын дауылдарға дайындалып жүр — бұл Жерорта теңізіндегі сирек, бірақ қауіпті құбылыс. Ғалымдар климаттың өзгеруі теңіз суының температурасын көтеріп, мұндай дауылдарға қосымша энергия беретінін ескертеді.
Алдағы күндері Жерорта теңізінің орталық бөлігінде тағы да найзағайлы жаңбырлар күтілуде.
