«Үйіне баратын болсам, көшеден тамағымды ішіп келемін»: Айнұр Тұрсынбаева келіні туралы айтып берді

Елімізге белгілі айтыскер ақын Айнұр Тұрсынбаева ұлы Бекланмен, келіні Мадинамен бірге Ләйлә Сұлтанқызына сұхбат беріп, отбасылық қарым-қатынастары жайлы еш жерде айтпаған сырын айтып берді, деп хабарлайды Sadaq.kz.

Ақынның айтуынша олардың отбасында әркім өз өміріне өзі жауап береді, әркім шешімді өзі қабылдайды.

«Қызым Айдананың да, ұлым Бекланның да жеке өміріне кірісіп, араласпағам. Біздің отбасымызда сондай, ешкім ешкімнің өміріне араласпайды. Әркім өз бетінше шешім қабылдай алады. Маған келінмен емес, ұлым Бекланмен тіл табысу қиындау. Өйткені ұлым перфекционист. Мен өте шыдамсызбын, ештеңені жоспарламаймын. Түсте Астанада отырсам, кешке Шымкентте отыруым мүмкін. Күні-түні үйден қонақ үзілмейді.

Ұлым да, қызым да ол жағынан маған ұқсамайды. Сол үшін де келініме ұлыммен қиын болмай ма екен деп ойладым. Мадина туралы бұрыннан көп білетінмін. Ұлым айтып жүретін. Келінімді көрмей жатып қатты жақсы көрдім. «Әке-шешесі жақсы адамдар болса екен» деп Құдайдан сұрап алдым. Мадинаның ата-анасы тура мен армандағандай болып шықты. Өте таза адамдар. 

Келініме «түнде мен келе жатыр деп есің шықпасын, онда сенде еркіндік болмай қалады» деймін. Ұлымның үйіне баратын болсам көшеден тамағымды ішіп барамын. Шай қайда, келін ерте тұруы керек деген әңгіме жоқ», – дейді ол.