Тәуелсіздік күніне арналған ерекше домбыра шарасы өтті

Тәуелсіздік күніне орай Ұлттық музейде мектеп оқушыларының ерекше шарасы өтті. Бұл күні Zerdeli International School-дың барлық оқушылары (100%) домбыра тартып, күй өнерін паш етті.

Іс-шараның басты мақсаты – ұлттық рухты дәріптеу, өскелең ұрпақтың мәдени және рухани дамуына ықпал ету, сондай-ақ қазақтың төл өнері – күйдің құдіретін жаңа буынға насихаттау болды.

Мектептің негізгі ерекшеліктерінің бірі – барлық оқушылардың домбыра тарту шеберлігін меңгеруі. Бұл бастама ұлттық құндылықтарды оқу процесіне енгізіп, өнерді дамытуға үлес қосу мақсатын көздейді. Оқушылардың домбырадағы шеберлігі тек мектеп шеңберінде ғана емес, еліміздің жас буынына үлгі болып отыр.

Директорының тәрбие ісі жөніндегі орынбасары Әли Сағадатұлы шараның маңыздылығына тоқталып, былай деді:
“Ұлттық құндылықтарды дәріптеу – білім беру жүйесінің басты бағыттарының бірі. Біз балаларға сапалы білім берумен қатар, оларды рухани дамыған, ұлттық болмысын қадірлейтін тұлға ретінде тәрбиелеуге ерекше назар аударамыз.”

Бұл шара жастардың өнерге деген қызығушылығын арттырып, ұлттық құндылықтарды бағалауға шабыттандыратын маңызды қадам болды.